Kürsi-i İstiğrak
Kenâr-ı bahrde hoş bir mahâldir, nâzır-ı âlem,
Tahaccür eylemiş bir mevcdir, üstünde bir âdem
Hayâlettir oturmuş, fikr ile meşguldür her dem.
Giyinmiştir beyaz amma bakarsın arz eder mâtem.
Bulutlar, dalgalar, yıldızlar etrâfımda hep mahrem,
Ağaçlar, cûylar, kuşlar, çiçekler dâima hurrem.
Bu tenhâ yerleri gördün mü sen zannetme hâlîdir!
Hayâlâtımla meskûndur, bu yerler pür-meâlîdir,
Muhât-ı aczdir, hem lâtenâhi birle mâlîdir;
Bu mevki’dir yerim sâhilde bir kürsî-yi âlidir.
Bulutlar, dalgalar, yıldızlar etrâfımda hep mahrem,
Ağaçlar, cûylar, kuşlar, çiçekler dâima hurrem.
Sukûnetle kuşanmış hây-hûy-ı şehri gûş eyle
Sehâb-ı hande-rîz u berk-i yekser-kahrı gûş eyle
Ağaçlardan çıkan efkârı seyret, nehri gûş eyle
Bu vahşet-gâhda sen gel benimle dehri gûş eyle.
Bulutlar, dalgalar, yıldızlar etrâfımda hep mahrem,
Ağaçlar, cûylar, kuşlar, çiçekler dâima hurrem.
Düşün ol zâtı kim emriyle zâtından iyân olmuş
Vücûd-ı sermedîsinden zemîn ü âsmân olmuş
Düşün deryâyı, her bir katre mevc-i bî-kerân olmuş,
Hafâyâ-yı İlâhîdir ki yek-dil, yek zebân olmuş,
Bulutlar, dalgalar, yıldızlar etrâfımda hep mahrem,
Ağaçlar, cûylar, kuşlar, çiçekler dâima hurrem.
Odur hîçî-i mâzi lücce-i surh-ı meşiyyetle
Bu tarîkî-yi müstakbel kebûd-ı sermediyette
Durur bir Kibriyâ-yı bî-nihâyet nûr-ı zulmette
Beraber cümle mevcûdât ü eşyâ hep muhabbette
Bulutlar, dalgalar, yıldızlar etrâfımda hep mahrem,
Ağaçlar, cûylar, kuşlar, çiçekler dâima hurrem.
Eder yek-digerin takbîl dâim Zühre vü zerre,
Yürür bir yolda mürg ü mâhi vü meh-tâb ü şeb-pere
Otur şu minber-i deryâ-muhât-ı senge bir kerre,
Hemen Allah’ı gör şâmil semâdan bahr ile berre
Bulutlar, dalgalar, yıldızlar etrâfımda hep mahrem,
Ağaçlar, cûylar, kuşlar, çiçekler dâima hurrem.
Yürür her burc bin asr-ı mücessemdir, mümâsildir
Zılâle sûrettâ, zannetme lâkin cism-i zâildir,